College Of Veterinary Medicine

مـــــعًا نحـــقــق الــــحـلــــم
 
الرئيسيةالبوابةالتسجيلدخول

شاطر | 
 

 أخبار بلدنا اليومين اللي فاتوا...بس بطريقة مختلفة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Soo Ghareeb
Admin


انثى عدد الرسائل : 2221
العمر : 29
تاريخ التسجيل : 06/09/2008

مُساهمةموضوع: أخبار بلدنا اليومين اللي فاتوا...بس بطريقة مختلفة   الجمعة أكتوبر 31, 2008 12:19 am


فى يوم تاريخى صدر حكم تاريخى فى قضيه غير عاديه اتحكم فى اول قضية تحرش جنسى على المتهم المدان ب3 سنين سجن طبعا حكم مشرف لكن التحية تستاهلها نهى رشدى صاحبة القضية اما براوة يا نهى وعقبال صدور تشريع وقانون رادع.

من حقنا نشيد بجراة الفتاه وبعدل القضاء بس لما المحامية بتاعتها تقرر استئناف القضيه لصالح المتهم بعد ادانته يبقى فى حاجة غلط وبعد البحث عرفنا ان نهى من عرب 48 وتحمل جواز سفر اسرائيلى وترى ان اسرائيل دوله محترمه وان هى متخصصة قضايا تحرش كل متروح بلد تاخد تعويض او تسجن حد ؟؟

لو الولد اتحرش يتسجن بغض النظر عن اختلافنا مع افكارها لكن لو الولد اتظلم والهانم عامله كمين يبقى اما براوة للمحاميه وربنا معاكى تصلحى اللى كان .

طن الحديد اللى كان وصل 7800 جند بقى ثمنه دلوقتى 3800 جند ومش لاقى حد يشتريه دة راجع لعوامل كتير ان الناس فلست اصلا والعالم داخل على ايام سوده على كل ظالم ومفترى ان شاء الله وربنا يلطف بالغلابه عقاب ربانى خفيف كمان عشان قرارت وزير التجارة المحترم بفتح الاستيراد على البحرى وبيقولوا اسعار العقارات هتنزل يعنى فى امل نتجوز يااخونا.

مسؤول ظريف ولطيف فى الكهرباء بيقولك ايه بقى مصر تحتاج الى 3 سد عالى عشان تنتج الطاقه المطلوبه طب هو فى سؤال رفيع للبيه اما احنا مش مكفيين روحنا بنصدرها ليه ؟؟ ولا هو حلال ليهم وحرام لينا .

فجأه وبدون سابق انذار مدحت بركات فى السجن والدنيا مقلوبه مين مدحت بركات مكنتش اعرفه المهم عرفت انه واحد من اباطرة الاراضى قلت وماسكينه ليه يااخونا قالك دة من الشريرين اللى سارقين اراضى البلد قلت ياماشاء الله دى حاجة لطيفه جا عقبال الباقيين واما براوة .

وبعدين الفار اياه الرخم اللى على طول بيلعب فى عبى قالى يا عبيط انت فاكر الميزان صحيح هيتعدل دة تلاقيه غلط وشم نفسة فجابوه الارض عشان يكون عبره لغيره يارب الفار يطلع قاسم السماوى ويطلع غلطان وتكون دى بداية تطهير بجد واما برواه لكل اللى بيشارك بقلب نضيف من غير تصفية حسابات رغم انف الفار بتاعى.

وكنت لسه بحاول افطس الفار راحت المصرى اليوم نشره مستندات رسميه تثبت ان وزير الاسكان الاسبق حرااامى بالفم المليان باع اراضى فى التجمع الخامس وفبلات فى مارينا لمراته وعياله اثناء توليه الوزارة العجيب انه لسه عضو فى مجلس الشعب ولسه الحصانه مترفعتش ولسه مفيش اتهام حقيقى من المسؤلين عشان يحاسبوه !!!

البيه ابراهيم سليمان ساكن فى فيلا فى مصر الجديده مفتكرش ابدا ان سيادته جاب فلوسها بطريق شرعى لازم يكون بطريق الاغتصاب وهتك عرض اموال الدوله فلوس الناس الغلابه ياترى هنشوف ابراهيم سليمان بيتحاكم وببتصادر ممتلكاته المسروقه ولا هنغمض عنينا ؟؟ الغريب بقى ان كل الناس عارفه اللى عمله طول مهو فى الوزارة الا الامن والقضاء ؟؟؟

عشرات من صحفى الدستور والبديل اضربوا عن الطعام احتجاجا على استبعاد امن الدوله ليهم متمثلا فى لجنة قيد الصحفيين من عضوية مجلس النقابه الغريب ان النقيب واعضاء مجلس الادارة محتجين ومعرفوش يعملوا حاجة انا مش فاهم امال مين اللى يقدر يعمل ؟؟؟

مصر اخيرا اعترفت انفلونزا الطيور مرضا مستوطنا فى مصر وتضع خطة غير معلنه لمواجهة تحوله الى وباء ربنا يستر .

بس فى خبر حلو استطا ع الدكتور مجدى القاضى وكيل كلية الطب البيطيرى فى بنى سويف اكتشاف لقاح جديد ومتطور لمكافحة انفلونزا الطيور وسيتم انتاج كميات كبيرة منه خلال عامين – اما براوه وعمار يا مصر .

الازهر يأيد فتوى سعوديه وتركيه تبيح للزوجه ضرب زوجها دفاعا عن النفس – بس هو فى حاجة مش فاهمها هى الزوجة اللى زوجها عنيف معاها هتقدر تضربه ازاى اصلا وهى كتكوته ضعيفه اكيد مش هتقدر يبقى الفتوى تدى هتنفع الستات المفتريه اللى اصلا فقدوا لقب ستات واسترجلوا خلاص ده مجرد تعليق اضربوا فى بعض مهى المشرحه ناقصه قتله .

عرفتوا مصر خدت المكز الاول فى ايه ؟؟؟ مصر بلا فخر حصلت على المركز الاول عالميا فى وفيات حوادث الطرق وتقرير التعويضات سنة 2007 بيقول ان تم صرف مليار جنيه تعويضات – هل مسؤليه الحكومه متمثله فى التخطيط العمرانىوالطرق؟ ولا مسؤلية المرور؟ ولا مسؤولية الافراد المتهورين ؟؟ ولا قضاء وقدر ؟؟؟ مش عارف بس الأكيد ان فى حاجه غلط.

ويظهر ان التقرير دفع ليبيا انها تطلب استيراد جثث من مصر عشان طلبة كليات الطب عندها اه يااخونا طلبت تستورد جثث شوفتوا وصلتوا بينا لفين على رئى يورى مرقدى وبغض النظر ان وزير التعليم العالى بيقول محصلش وان المستشار الثقافى فى سفارتنا هناك بيقول حصل لكن المحزن فى الامر هو مجرد التفكير فى الامر .

فى وفد زراعى كان رايح اسرائيل ووزارة الزراعه بتقول محصلش دول مش تبعنا اى كان ففى وفد كان رايح ومحدش هيعرف بس الليله اتعرفت عشان راجل صايع واذكى اخواته عرف ان فى اسرائيل المعسل غالى راح شايل ومحمل شنطتين معسل عشان يتاجر بيهم فى اسرائيل عملا بمبدا الرزق يحب الخفية والبيزنس مالوش دين ولا مله ولا يعرف ابويا ولا امى وللاسف المواطنين اللى على شاكلة صاحبنا البرينجى كتير .

طبعا احنا فى مدرسين بنحترمهم وانا واحد من الناس لسه بعتز ببعض مدرسينى بس لما مدرس يمسك مقشة وينزل ضرب فى العيال ولا الخدامه اللى صحتها حلوه ومسكت منفضة واستفردت بسجادة على السلم يبقى لينا وقفه 15 طفل يتهانوا ويتكسروا بين جروح وكدمات اه تم اتخاذ اجراء ضد المدرس بس ايه اللى يضمن انه ميتكررش ؟؟

ومازلنا فى مسلسل مدرسين خلف القضبان بس المره دى مش كدمات وضرب مقشات نووو دة البيه خلص على تلميذه خالص عيل عنده 11 سنه لسه بيفتح مع الدنيا لسه اهله بيحلموا عشانه فجاءه مات ليه عشان مدرس متخلف ضربه لحد ما مات لا تعليق.

وزير التنميه الاداريه رجل التكنولوجيا الاول دكتور احمد درويش بيقول ان مفيش بطاله فى مصر والوظائف مش لاقيه حد مش هرد عليه حد غيرى يكلمه .

الحقيقة فى حملة تطهير فى القضاء غير مسبوقه وحاسس ان فى صدق ورغبه صادقه فى تطهير هذا المكان المحترم اللى هو ملجأ لكل الفئات اما براوه كل اللى بيجتهد فى الطريق ده .

وزير الثقافه يدعوا لقبول الديانات الارضيه من من منطلق مبدا حرية العقيده وبيصف من يرفضها بالجاهل والمتخلف لحد هنا ده حقة يقول اللى يعجبه واللى بيعجبه دة كتير بقالنا سنين شبعنا من افتكاساته بس مجتش على دى يعنى – انا بقى بدعوا لتجاهل الديانات الارضيه وعدم الالتفات ليها من منطلق التوجيه القرأنى لا تسبوا الهتهم حتى لا يسبون الله لكن بنرفضها واصف كل من لايرفضها بالجاهل والمنافق حلو الاختلاف ده عشان وزير الثقافه المتفتح المستنير ينبسط .

===================================
هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.

واخيرا وليس أخرا مصر هتفضل غالية عليا.


منقووووووووووووووول

_________________
القلب الابيض هو الذي يحمل الخير لغيره وان اسودت الدنيا من حوله
الرجوع الى أعلى الصفحة اذهب الى الأسفل
http://vet-isma3lia.yoo7.com
sarrah nafee
بيطري جامد
بيطري جامد


انثى عدد الرسائل : 590
العمر : 28
تاريخ التسجيل : 14/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الجمعة أكتوبر 31, 2008 10:33 am

و الله حرام انى استفتح يومى بالاخبار الرائعه دى
بس انا متصدمتش زى ما كان بيحصلى لما كنت بقرأ المهازل دى زمان
عموما شكرا يا سووووووو على الاخبار الى تفتح النفس دى
مستنينك كل جمعه تنزللنا احداث الاسبوع
الرجوع الى أعلى الصفحة اذهب الى الأسفل
Soo Ghareeb
Admin


انثى عدد الرسائل : 2221
العمر : 29
تاريخ التسجيل : 06/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الجمعة أكتوبر 31, 2008 11:03 am

ههههههههههه

ولا يهمك يا سارة...

احنا المفروض نكون على اطلاع تام بكل اللي بيحصل حوالينا

حلو بقى او وحش

هنجيب الخبر زي ما هو

_________________
القلب الابيض هو الذي يحمل الخير لغيره وان اسودت الدنيا من حوله
الرجوع الى أعلى الصفحة اذهب الى الأسفل
http://vet-isma3lia.yoo7.com
Hosny_Mostafa
Admin


ذكر عدد الرسائل : 961
العمر : 28
تاريخ التسجيل : 09/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الجمعة أكتوبر 31, 2008 2:15 pm

ربنا يكرم الناس دي اخر كرم
ظبطوا البلد و خلوها احسن حاجة
احمد نظيف نظفنا على الاخر
ربنا على كل ظالم

_________________
جوالة .. رجالة
و دماغنا مغلبانا
على الارض الكشفية
جينا و سيزل معانا

الرجوع الى أعلى الصفحة اذهب الى الأسفل
http://www.facebook.com/group.php?gid=70177595045
super_vet
بيطري قدير
بيطري قدير


ذكر عدد الرسائل : 2155
العمر : 29
تاريخ التسجيل : 24/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الجمعة أكتوبر 31, 2008 6:51 pm

مش هقول غير كلمة واحدة (حسبي الله ونعم الوكيل)

_________________
هدخل علي فترات لظروف خاصة
الرجوع الى أعلى الصفحة اذهب الى الأسفل
http://www.esnips.com/web/sobhyfaculty1
sarrah nafee
بيطري جامد
بيطري جامد


انثى عدد الرسائل : 590
العمر : 28
تاريخ التسجيل : 14/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   السبت نوفمبر 01, 2008 12:28 am

و الله يا صبحى الناس كلها مبقتش تقول غير الكلمه دى
(((حسبى الله و نعم الوكيل)))
الرجوع الى أعلى الصفحة اذهب الى الأسفل
Soo Ghareeb
Admin


انثى عدد الرسائل : 2221
العمر : 29
تاريخ التسجيل : 06/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   السبت نوفمبر 01, 2008 2:43 pm

معلش يا جماعة

هو دا حال الدنيا

شكرا لمروركم

_________________
القلب الابيض هو الذي يحمل الخير لغيره وان اسودت الدنيا من حوله
الرجوع الى أعلى الصفحة اذهب الى الأسفل
http://vet-isma3lia.yoo7.com
samar-farid
Supermoderators


انثى عدد الرسائل : 1817
العمر : 27
تاريخ التسجيل : 13/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   السبت نوفمبر 01, 2008 5:49 pm

شكرا على موضوعك
الله يفتح نفسك
الرجوع الى أعلى الصفحة اذهب الى الأسفل
Soo Ghareeb
Admin


انثى عدد الرسائل : 2221
العمر : 29
تاريخ التسجيل : 06/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   السبت نوفمبر 01, 2008 5:53 pm

معلش يا جماعة

هو دا حال مصر

ولا انا اجيب حاجة من عندي

عشان نحس اننا مرتاحين؟؟؟؟

_________________
القلب الابيض هو الذي يحمل الخير لغيره وان اسودت الدنيا من حوله
الرجوع الى أعلى الصفحة اذهب الى الأسفل
http://vet-isma3lia.yoo7.com
Soo Ghareeb
Admin


انثى عدد الرسائل : 2221
العمر : 29
تاريخ التسجيل : 06/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الخميس نوفمبر 06, 2008 11:50 pm

اخبار بلدنا اليومين اللى فاتو 06-11-2008
======================


· الاسبوع اللى فات كان فى مؤتمر الحزب الوطنى اللى هو الحزب الحاكم فى بلدنا والمفروض انه مؤتمر كشف حساب وطبعا المفروض حاجة وواقعنا حاجة تانى .

· ابرز حاجه فى المؤتمر الهجوم الشديد من اعضائه على المعارضه المصريه او مايسمون بالمعارضه وكان وجهة نظر الوطنيين ان المعارضيين شريرين ومتخلفين وعايزين يرجعوا بينا للعهد البائد .

· قام المعارضيين الاحرار مسكتوش والقوا تصريحات ناريه كلها تنصب فى بوطقة ان الحزب الوطنى مفلس وهو حزب ضايع وضعيف اخر حاجة وانه هو اللى جايب البلد لورا .

· ومابين دول ودول احترت واحتار دليلى ومش قادر اقول ال2حلوين ال2 طعمين على رئى الاغنيه اياها وكما قلنا من قبل كل يغنى على ليلاه واحنا الشعب ملناش علاقه لا بدول ولا بدول احنا مع رغيف العيش وكارت المحمول وفلوس المدارس والدروس الخصوصيه والبطاله الخ.......... .

· فقدت مصر عالم محترم وشيخ جليل ورجل فى زمن عز فيه الرجال هو فضيلة الدكتور / محمد المسير – اذا اردت ان تسمع رجل مقنع وواضح وصريح لا يجامل ولا ينافق ولا يغير حديثه فكان يجب ان تسمع هذا الرجل العجيب بقى انى قعدت ادور على خبر وفاته كتير بعد ان علمت بالصدفه من برنامج الطبعه الاول بخبر وفاته شوفتوا كده فى الدنيا رجل مثله نعلم بخبر وفاته صدفه هنقول ايه اخر الزمن انا لله وانا اليه راجعون رحمة الله عليك يا دكتور محمد.


· نهى رشدى كنا اتكلمنا عليها اللى بيسموها فتاة التحرش اللى حيينا شاجعتها وفى نفس الوقت كان فى كذا علامة استفهام على انسحاب محاميتها وانضمامها للخصم وكان رد نهى للمصر ى اليوم لست اسرائيليه وتصريحات المحامية جريمه ومش مهم عندنا اسرائليله ولا غيره لو السائق فعلا كان اتحرش بيها فعلا بس هى الفكرة هل هو اتحرش بيها فعلا ؟؟

· وحدة الغسل الكلوى بالمنصورة المياه انقطعت عنها 5 ايام ومحدش اتحرك رئيس المرز وصل خرطوم بكولدير فى الشارع عشان عمليات الغسيل متقفش !!! فى سؤال رفيع لو كانت المياه دى انقطعت ساعتين 3 عن فندق ولا قريه سيايحه ولا ملعب جولف ياترى كان ايه اللى هيحصل ؟؟؟

· نتيجة الكادر ظهرت للمعلمين وكانت النتيجة 85.9% طبعا الاعتراضات كتير والتظلمات كتير وأى كان موقفنا من الكادر ومن المعلمين ياريت الموقف دة يخلى المعلمين يحسوا بطلبة الثانويه العامه عشان كل ماالطلبه تقول الامتحان صعب النتيجه غلط يطلع المدرسين يقولوا مش صحيح وكان الحل انهم يتذوقوا من نفس الكاس بس مين يفهم ؟

· مسلسل التعذيب فى المدارس مازال مستمرا وكل يوم طفله تموت عيال تتعبط وكان مفيش حاجة حصلت بس كتر خيرة وزير التربيه والتعليم كلم اسرة الولد اللى مات فى اسكندريه على ايد المدرس وقال لاهله انا والوزارة اسفين وسنعوضكم لا تعلبييييييق .

· على الرغم ان الجمله الشهيره ( هى دى مصر يا عبله )) اللى اتقالت فى فيلم الصعود الى الهاوية اصبحت جملة للسخريه وليس للتعبير عن الانتماء وحب الوطن لكن ملقتش غيرها يعبر عن الخبر ده (( الاقباط الارثوذوكس يحتفلون ببدء الصلاه بكنيسة المعادى ومعهم المسلمون المساهمون فى بنائها )) .

· كل يوم اعتامات ومظاهرات ززقفات احتجاجية فى كل حته فى مصر من اسوان لاسكندريه من الطلبة والفلاحين من الممرضات والمدرسين من الاطباء والمستثمرين باختصار كل الفئات مش عاجبها حاجه ومش عاجبها حد بس لو فضلت الطريقة دى هى الطريقة الوحيدة للحصول على الحقوق فى بلدنا بعد شويه هتفقد مفعولها لازم يكون فى حل .

· كل يوم نسمع عن اغلاق مستشفيات وغرف عمليات ومنع استخدام انواع غاز معينه ومحدش بقى فاهم حاجة والجديد بقى بيع المستشفيات بس بيقولوا اطمنوا القصر العينى مش للبيع يعنى الصحة والتعليم بيتخصخصوا هو ايه اللى فضل من حقوق المواطن كده احسن عمال ادور مش لاقى .

· استراليا ترفض بيع الخرفان لمصر لسوء معاملاتها للحيوانات عالم رايقين اوى بجد .

· نظافة القاهرة تزيل 50 شجرة من اشجار العباسيه بحجة منع الاعمال المنافية للاداب بقى قص الشجر هيمنع الاعمال المنافية للاداب فى مكان اصلا بؤرة الحركة الجامعات والكتدرائيه ومسجد النور اااااااااااادينىىىى عقلللللللك.

· بعد فشل وزارة البيئة وزارة الزراعه تتبنى مسئولية القضاء على السحابة السوداء وانا شايف ان المسئوليه مش مسئوليه حكوميه بقدر مهى مسئولية شعبيه من الفلاحين والمحليات يااخونا كفايه تنبله بقى .

· محافظ القاهرة يحيل رئيس فرع هيئة النظافه بمدينة نصر للتحقيق بتهمة الاهمال والتقاعس عن اداء الواجب امااااااااا براوة معلش الخبر ده على مزاجى حيث انها منطقتى ملعبى وصباى الغاليه مدينة نصر .

· أوبامبوا مسك يااا رجاااله على رأى واحد صاحبى سودانى متفائل اوى بأوبامبوا بس هل ده تفائل بأوباما فعلا ولا فرحه بسقوط الطاغيه بوش يلا اهو هيترمى فى مزبلة التاريخ زى كل اللى زيه هو ده اللى مهما حاولوا انهم يزيفزه مش هيعرفوا ابدا .

=======================

·
حمدى قنديل هؤلاء قادرون على حكم مصر
http://www.masrawy.com/News/Egypt/Politics/2008/november/5/hamedi-kandeel.aspx

· والله ونورت يا عبدالرحمان
http://www.almasry-alyoum.com/article2.aspx?ArticleID=185359&IssueID=1216

· الوطنى يرفع شعار لا للتغيير
http://www.almasry-alyoum.com/article2.aspx?ArticleID=185376


هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم اتمنى ان تكون كل اخبارى بعنوان اما براوه وكم انا حريص على الارتقاء بلغة الحوار والنقد حتى نكون موضوعيين فاختلافنا هدفه التكامل وليس التضاد.

واخيرا وليس أخرا مصر هتفضل غالية عليا.




_________________
القلب الابيض هو الذي يحمل الخير لغيره وان اسودت الدنيا من حوله
الرجوع الى أعلى الصفحة اذهب الى الأسفل
http://vet-isma3lia.yoo7.com
zeina
Admin


انثى عدد الرسائل : 4232
العمر : 28
تاريخ التسجيل : 11/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الجمعة نوفمبر 07, 2008 5:02 pm

حسبى الله ونعم الوكيل على كل ظالم ومفترى ما فيش غير كدة يتقال
مرسى يا جميل على الموضوع
الرجوع الى أعلى الصفحة اذهب الى الأسفل
zeina
Admin


انثى عدد الرسائل : 4232
العمر : 28
تاريخ التسجيل : 11/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الجمعة نوفمبر 07, 2008 5:13 pm

فعلا هيا دى مصر ياسها
ربنا يستر
الرجوع الى أعلى الصفحة اذهب الى الأسفل
zeina
Admin


انثى عدد الرسائل : 4232
العمر : 28
تاريخ التسجيل : 11/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الجمعة نوفمبر 07, 2008 5:20 pm

يا حبيبتى البلد دى مش ماشية على الرأى والراى المعارض دى ما شية على الرأى والرأى المنافق
االمعارضة دلوقتى مش عشان نصلحة البلد دى عشان مصالح شخصية
االحزب الوطنى يتكلم والحزب المعارض عكسه واحنا قاعدين بنتفرج وخلاص
الرجوع الى أعلى الصفحة اذهب الى الأسفل
Soo Ghareeb
Admin


انثى عدد الرسائل : 2221
العمر : 29
تاريخ التسجيل : 06/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الجمعة نوفمبر 07, 2008 6:49 pm

عندك حق يا زينة

بس احنا كشباب لازم يكون لينا موقف

احنا عايزين مصر تبقى احسن بلد في الدنيا

عشان نرفع راسنا قدام كل الناس ونقول

المصريين اهم من غير ما نحس باحراج

شكرا لمرورك يا زينة

_________________
القلب الابيض هو الذي يحمل الخير لغيره وان اسودت الدنيا من حوله
الرجوع الى أعلى الصفحة اذهب الى الأسفل
http://vet-isma3lia.yoo7.com
Soo Ghareeb
Admin


انثى عدد الرسائل : 2221
العمر : 29
تاريخ التسجيل : 06/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الجمعة نوفمبر 14, 2008 4:03 pm

اخبار بلدنا فى 13/11/2008
====================

· طبعا كلنا تابعنا قصة هايدلينا والقضاء اللى انتهت بحكم يقضى ببراءة جميع المتهمين زى احكام كتير بتصدر ببراءة الجميع وكان مفيش متهم لكن عشان فى نائب عام محترم الراجل نقض الحكم واخيرا تحقق له مااراد فقامت محكمة النقض بالغاء براءة هانى سرور واخرين وارسلت القضية للاستئناف لاعادة المحاكمه قدام الجنايات اماااااا براوه وعقبال العباره.

· لابسه عباية وحجاب محترم وقفاز وماشيه مع طفل وبردة تم التحرش بها دة ملخص ماحدث لفتاه فى اكتوبر عروسه جديدة ماشية مع بن اختها طفل 3 سنين جه عامل اهبل مشى وراها و على طريقة عبدالفتاح القصرى ياصفايح الذبدة السايحه يا جوز يالوز طبعا محدش عبره قام اتحرش بالبنت واهو اتمسك ولا هينفعوا عبدالفتاح ولا هيثم دبور وهيتنفخ ان شاء الله.

· بيقولوا فى نظام جديد للخصخه والحقيقه مفهمتش حاجة او محاولتش افهم لحد مالقانون يتقلوظ ويتوافق عليه من المجلس ونشوف اخر صوره بس هو المفيد انه على طريقة عايز حقى .

· كل ميطلع وزير الماليه يقولك بنستورد ب6 مليار قمح لحد محفظناها بس محدش قلنا انه بيستوردولنا علف حيوانى على انه قمح ودى الفضيحة التى ثبت تورط الحكومه والقطاع الخاص فيها لا غنى ولافقير بقى الكل اكل عيش حيوانى مصر بتتقدم بينا فعلا ربنا يوفقكم .

· مسلسل تعذيب التلاميذ فى المدارس وصل لدرجة ان مدرس يجبر تلميذه فى الصف الرابع بخلع بنطلونها ويسخر منها يعنى فى شوية معقدين بيدرسوا لاطفالنا فى المدارس.

· 3 مشاجرات فى مدارس القاهرة تنتهى باصابات لمعلمين وتلاميذ والسبب يبدا بسوء المعاملة مرورا برفض تلميذ جمع القمامه من الحوش واخيرا لخلاف على المجموعات المدرسيه مش عارف اقول ايه الحقيقه ولسه الوزير قاعد على كرسيه بيرغى فى الكادر واللى مكدرش التعليم يحتاج قياده قبل اى شىء اختاروا ناس الاول قبل متعملوا قوانين وتشريعات.

· مصادمات الحقيقه محزنه بين البدو فى سيناء والداخليه اسفرت عن مقتل 4 من البدو واصابات فى الشرطه وحرق وتلفيات كثيره لا تعليق لان اى كلام هيبقى من باب اللى ميعرفش بيقول عدس .

· اكتشوفوا هرم جديد فى سقارة عشان يبقى كده عندنا بتاع 119 هرم حجارة بس ياترى فى كام هرم بشرى نفكر كده مع بعض ؟؟

· د احمد فتحى سرور رئيس لمجلس الشعب للسنه 19 على التوالى منذ اغتيال رفعت المحجوب وحتى الان طبعا نبارك لاحمد بيه لكن هلى نبارك للشعب اللى هو رئيس مجلسه ؟؟

· على طريقة فيلم السفارة فى العمارة بس مع تغيير الاسم للسفير فى الجيم قاضى حرر بلاغ ضد السفير الاسرائيلى وحرسه بعد التضييق عليه فى محل مسكنه الحكاية ان الشاب السفير بيروح جولدن جيم اللى فى المعادى والجيم فى الدور ال8 والقاضى ساكن فى ال3 جه القاضى يخرج من باب العماره اتمنع—حد يقولى ليه؟؟؟ لحد السفير ميطلع عشان الامور خايف على نفسه احسن حد يعمل فيه حاجه وحشه.

· وزارة الصحه رفعت سعر 55 نوع دواء جديد وفى انواع وصلت الزيادة فيها لحد دلوقتى ل400% وبعدين ؟؟

· اعتراضات ووقفات احتجاجية مسانده فى كل مكان للطبيبين المحتجزين فى السعوديه .

· وزارة القوى العامله تحظر سفر الاطباء الى السعوديه بسبب ازمة الطبيبين والقرار جاى من فوق عشان للصبر حدود واما نشوف هترسى على ايه .

· مصر تمنع 3 دبلوماسيين اوروبيين من دخول اراضيها لعدم حصولهم على تأشيرات مسبقه من منطلق مبدا المعامله بالمثل ايون كده بقى بينوا كرامه احسن خلاص الحصى فى الارض بقى اغلى مننا .

=====================


_________________
القلب الابيض هو الذي يحمل الخير لغيره وان اسودت الدنيا من حوله
الرجوع الى أعلى الصفحة اذهب الى الأسفل
http://vet-isma3lia.yoo7.com
Soo Ghareeb
Admin


انثى عدد الرسائل : 2221
العمر : 29
تاريخ التسجيل : 06/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   السبت نوفمبر 22, 2008 7:07 pm

معلش يا جماعة الاخبار المرادي جاية متأخر شوية... اعذروووووني

اخبار بلدنا فى 20/11/2008
=======================

الاسبوع اللى فات كنت نوهت عن برنامج الحكومه الجديد للخصخصه على طريقة عايز حقى منغير مخوض فيه لانى مكنتش فاهم حاجة والاسبوع دة فهمت شويه البرنامج اسمه برنامج الملكيه الشعبيه وده تقدم كبير عرفنا العنوان .

اه نسيت اقولكم ان محدش غير الحكومه فاهم ولا حتى عاجبه موضوع برنامج الملكيه ده والجرايد كتبت والمعارضه كتبت وكله عمال يفتى واراء ووجهات نظر كتير لدرجة ان الفار اياه ابتدى يلعب فى عبى ان الموضوع وراه إنه على رأى القرد بتاع شومبنجو .

بس مخالفا لرأى الفأر ومع احترامى الكامل للقرد الشومبنجى وبعد كل اللى انطرح الأسبوع اللى فات ومخالفا لكل اللى مش عاجبه انا عاجبنى الموضوع جدا ويظهر ان الحدايه فى 2008 ممكن تحدف كتاكيت .

وزير التعليم يحذر الطالب والمعلم من الخروج على قرار منع العنف تفتكروا بقى حد سمع كلام سيادة الوزير ولا كان مجرد كلام جرايد ؟؟؟

3 وقائع ضرب فى 3 مدارس والحذاء الحريمى كان السلاح فى واقعتين والضرب كان بين مدرس ومدرسه ومدير وولية امر ومدرس ورئيس تعليم ابتدائى يعنى من جوه الوزارة يا معلم وده كان اول رد على سيادة الوزير .

مدرس فى مدينة ملوى بمحافظة المنيا قام بالرد العملى على الوزير مش بس ضرب تلميذ بعصاية مكنسه لا وكمان ضرب المدير بالكرسى فعلا فعلا ياسيادة الوزير تحذيرك جاب نتيجه والى اللقاء فى الحلقه القادمه من مسلسل تصريحات بنى خيبان .

امين الاعلام فى الحزب الوطنى الدكتور على الدين هلال يقول( المصريون لا يتقبلون التحول الديمقراطى والناس تريد الحكومه بابا وماما وانور وجدى ) الحقيقة خفة دم سعادته ملفته للنظر سكر .

ازمة فى بنزين 80 بصورة مستفزه وطبعا الحجج كتير بس فى ازمه وتعطيل مصالح كتير .

الحديد بعد ما قلنا عقل رجع اتجنن تانى والبركه فى الاشاعات المتفبركه اسعار الحديد ارتفعت بشكل مبالغ فى الاسبوع اللى فات والاسمنت مش لاقينه غير ان هو كمان سعره ارتفع .

فاكرين فى العيد لما حصل تحرش جماعى فى جامعة الدول العربيه بفتايات المهم صفصفت على 2 واحد راح الاحداث عشان سنه صغير والتانى اتحكم عليه بسنه سجن يلا عقبال مايصدر قانون منع التحرش اما براوه .

فاكرين وثيقة اللب الفضائى اللى عملولها مؤتمرات وزيطة وزنبليطه واضح انها فى طريقها لمفرمة الورق بسبب انتقادات الاعلام وتراجع العرب عن تأييدها ولا عزاء لمهندس هذه الوثيقه .

حكم فريد ونادر ومحترم هو صحيح مش هيتنفذ بس عشان ميبقاش ليهم حجه القضاء الادارى تصدير الغاز المصرى لاسرائيل بااااااااااااااااااطل باااااااااااااااااااااطل باااااااااااطل طبعا الحكومه استئنفت بس مش مهم بردددده باااااااااااطل .

طبعا كنا اشدنا الاسبوع اللى فات بتصرف الخارجيه المصريه مع دبلوماسيين الدول اللى مستهبله فيها وكانت النتيجه ان 80% من الدول الاوربيه تطلب الاعفاء المتبادل لـتأشيرات الدبلوماسيين مع مصر طبعا اما براوه وعقبال المواطن المصرى .

مفتى ومؤسس تنظيم الجهاد الدكتور سيد امام عمل مراجعات كتير لفكر الجماعه اللى اسسها طبعا الدكتور ايمن الظواهرى معجبوش قام مطلع كتاب اسمه التبرئه بيرد فيه قام الدكتور سيد مطلع كتاب اسمه التعريه بيكشف فيه اكاذيب الدكتور الظواهرى ودى حاجه لذيذه جدا لانها بتكشف الحقيقه وبتسقط الفكر المتطرف وتظهر الحقيقه امام من يعتنقون ذلك الفكر .

البورصه بنت ال.... ولا بلاش بقالها 4 ايام بتقع ولسان حال كل اللى اشتغل فيها وهو مش فاهم غلطه وندمان عليها .

القراصنه لحد وقت قريب كنا بنسمع عنهم فى السيما الامريكاوى لكن يظهر ان فيلم الحقيقه ابشع كتير من فيلم الخيال عمليات القرصنه مبهدله الدنيا المصيبه انهم فى طريق قناة السويس يعنى هيتخرب بيت اقتصادنا احنا اللى انا مش فاهمه فى عصر القمر الصناعى اللى بجيب بيه بيتنا وانا قاعد مكانى مش عارفين نضرب شوية قراصنه بضربة طيران ؟؟؟؟

ولا الحكايه فيها إنه وفى ناس من مصلحتهم الموضوع ده واقصد طبعا دول بره .

خبر طريف تم توثيق 150 عقد زواج عرفى مع ان الازواج فى سن الستين والخمسين وعندهم ابناء واحفاد والكلام دة تم فى وادى مندر فى شرم الشيخ لحفظ حقوق الاجيال القادمه وحقوق المواطنين لدى الدوله وطبعا معروف ان الزواج فى البدو بيتم بالعرف والاشهار وليس بالعقود الطريف ان الازواج الستنيين كانوا فى قمة الخجل اثناء تحرير العقود وشهم كان محمر يا عينى .



_________________
القلب الابيض هو الذي يحمل الخير لغيره وان اسودت الدنيا من حوله
الرجوع الى أعلى الصفحة اذهب الى الأسفل
http://vet-isma3lia.yoo7.com
Soo Ghareeb
Admin


انثى عدد الرسائل : 2221
العمر : 29
تاريخ التسجيل : 06/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الأحد ديسمبر 07, 2008 9:59 am

من المحاصر غزه أم إرادة الشعب المصري ؟؟؟

· (( حصار غزه )) هل هو حصار لشعب أعزل شقيق ام حصار لإرادة الشعب المصررى؟؟ - الكلمه دى إدانه لمصر قبل ما تكون إدانه للصهاينه معنى كلمة حصار ان مفيش منفذ يعنى الصهاينه من ناحية ومصر من ناحيه ولا حد يقولى انت غلطان !!!!

· لما تكون قطعه عربيه مفيهاش اكل ومفيهاش مياه ومفيهاش وقود ومفيهاش كهرباء ومفيهاش ضحكه شعب كامل لا يستطيع الابتسام واحنا بنتفرج لتصفية حسابات سياسيه واسقاط قوى معينه يبقى احنا مهرجين ومش هرغى فى حوار ان التاريخ لن يغفر ولن يسامح ده كله كلام مالوش قيمه عند البعض لكن الله لن يغفر ولن يسامح واعتقد ان المبررات السخيفه والكلام الاستهلاكى مش هينفع قدام ربنا هتضحكوا على مين ؟؟ .

· مصر من اسوان لاسكندريه خرجت فى مظاهرات تندد بالحصار فهل من مستمع ؟؟؟ ولا البلد دى بتاعت مين بالظبط .

· شيخ الازهر سافر لمؤتمر دولى للحوار حاجة تبع الاممم المتحده فى نيويورك فجاءه لاقى فى وشه واحد بيسلم عليه راح مسلم طلع بعد كده انه رئيس الصهاينه قامت الدنيا ومقعدتش على شيخ الازهر بصوره افقدت فكرة النقد موضوعيتها الحقيقه لان اى واحد فى الموقف ده بالصوره دى هيسلم .

· شيخ الازهر قال انه فوجىء بالشخص بيسلم وانا معاه ومصدقه وقال انه اصلا ميعرفش دة مين وميعرفش انه شيمون بيريز انا بقى فى دى مش معاك واسعه شويه والفار اياه اللى بيلعب فى عبى مصدقش لكن بالنسبه للهجوم على شيخ الازهر بالصورة دى شىء مخجل الحقيقه فى اوضاع كتير فى حياتنا تستاهل الهجوم بضراوه اكتر من الموضوع ده وبلاش نبقى طبالين فى زفه .

· مرشد الاخوان صرح وقال ان الاخوان معندهمش مانع ان جمال مبارك يترشح للرئاسه بشرط ان يغادر والده السلطه اولا - مش فاهم الحقيقه ايه مغزى التصريح ده فى التوقيت ده لان تفكيرى محدود الحقيقه بس الايام مفيش اقرب منها ومسيرنا نعرف ده تصريح عادى ولا ورااه إإإنه .

· لجنة الدفاع والامن القومى فى مجلس الشعب سافرت سيناء وقعدت مع البدو هب اللجنه مشيت من هنا الامن قام واخد الاهالى وقبض عليهم وكيل لجنة الدفاع امين راضى قدم احتجاج والراجل شايف ان دى اهانه للمجلس ولــ اللجنه وبتفقد البرلمان مصداقيته مع المواطنين انا مش عارف مين اللى بياخد القرارات العجيبه دى وكل ما نتقدم خطوه لقدام نرجع عشره لورا.

· طبعا كلنا نسمع عن مؤسسة روزاليوسف رئيس تحرير الجريده يظهر انه شخص قليل الادراك وده لفظ مهذب -عشان يجامل السلطه قام كاتب مقال بيخوض فيه فى عفة سيده وشرفها لمجرد انها زوجة رجل معارض وهى السيدة جميله اسماعيل زوجة ايمن نور افتكر ان عقوبة قذف المحصنات لو بنطبق القوانين السماويه مش الوضعيه كانت تخلى امثال هذا المنافق يفكر الف مره قبل ان يكتب تلك التفاهات .

· فى مؤتمر للحركات التحرريه كان هيعقد فى نيويورك قاموا وجهوا دعوه لواحد من الداعيين لاضراب 6 ابريل الراجل وافق وراح المطار وخلص اجرءاته وفوجىء بعد كده بمنعه من السفر ليه منعرفش طبعا ليه معروفه بس ااقصد ايه السند القانونى طبعا مفيش وسلملى على الدستور وسيادة القانون .

· كاتب امريكى بجح بجريدة اسمها وول ستريت جورنال ودى جريده امريكاوى دعا المجتمع الغربى لنبذ الصحفيين المصريين عشان بيكرهوا اليهود ومفتريين وشريرين وبيخترعوا اكاذيب عن اليهود على الرغم ان اليهود دول حلويين خالص وكمال خالص شوفتوش انكت من كده يااخونا هو الضغط جالنا من قليل .

· فى منطقه اسمها طوسون فى اسكندريه طردوا الاهالى منها ليه بقى عشان يضموها لنادى يعنى ناس بقت فى الشارع عشان حتة نادى كبر ولا صغر مجرد شىء ترفيهى ثانوى لكن بما انننا ناس منعرفش ايه اولوياتنا وبما اننا فى مصر يبقى ليه نستغرب وحلال على نادى الاتحاد ونائب الشعب محمد مصيلحى حتة الارض .

· وزير الصحة راح زيارة مفاجئة لمستشفى حلوان فوجىء بوكيل وزارة الصحه بالمحافظة بيستقبله قاله اتفضل امشى وروح شوف شغلك وبلغ المحافظ ان القمامه حوالين المستشفى فضيحه وبعد جوله كافىء فيها ناس وعاقب ناس انا بحى الوزير ده واما براوه .

· نقيب مرور محترم رفض رشوه شهريه وبصفه منتظمه ااضعاف مرتبه فى مقابل ان يقوم بتسهيل حركة سيارات تابعه لمؤسسة نقل جماعى اما براوه وده مش غريب على الناس اللى بضحى بحياتها عشانا مش هضحى بشوية فلوس الغريب هو العكس على فكرة محافظ القاهرة كرم النقيب .


هذا النقد لانفسنا قبل ان يكون لغيرنا وهو لمسئولين وليس لاشخاص فلايزايد احد على حب مصر فكلنا نحبها وكم نتمنى ان تكون كل اخبارنا بعنوان اما براوه وكم نحن حريصون على الارتقاء بلغة الحوار والنقد حتى نكون موضوعييون فأختلافنا هدفه التكامل وليس التضاد.

واخيرا وليس أخرا مصر هتفضل غاليه علينا

_________________
القلب الابيض هو الذي يحمل الخير لغيره وان اسودت الدنيا من حوله
الرجوع الى أعلى الصفحة اذهب الى الأسفل
http://vet-isma3lia.yoo7.com
zeina
Admin


انثى عدد الرسائل : 4232
العمر : 28
تاريخ التسجيل : 11/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   الأحد ديسمبر 07, 2008 2:20 pm

ولا يهمك يا سووو
ميرسى على الاخبار
وكنت مستنيهاااااا
مشكورة على المجهود
وهقراها تانى وامخمخ فيها وارد عليكى
الرجوع الى أعلى الصفحة اذهب الى الأسفل
Soo Ghareeb
Admin


انثى عدد الرسائل : 2221
العمر : 29
تاريخ التسجيل : 06/09/2008

مُساهمةموضوع: رد: أخبار بلدنا اليومين اللي فاتوا...بس بطريقة مختلفة   السبت ديسمبر 13, 2008 5:07 pm

تحرۥش... تحرۥش... تحرۥش
=================

50 حالة تحرش في وسط البلد بس أول يوم العيد دول اللي تمسكوا يعنى لو قلنا الكروديات اللي بيتمسكوا 20% يبقى كام حالة حصلت ؟؟؟؟ وخلى بالكم ده في وسط البلد بس يعنى لا قولنا المشمهندسين ولا حلوان ولا مدينة نصر – مدينة نصر دى مدينة نصر دى عايزه عداد الكتروني لوحده عشان يعد الحالات.

ومازلنا مع سمة العصر ولغة حوار هذا الجيل مع التحرش ضبط 137 حالة فى وسط البلد بردة بس تانى يوم العيد واضح إن مفيش فايده

سؤال العيد : متى يتدخل الرئيس مبارك لحل أزمة الطبيبين في السعودية؟؟؟؟؟

السعودية أهدت لمصر عبارتين واحده اسمها الرياض والتانيه اسمها القاهرة هديه للشعب المصري ولنقل الحجاج والمعتمرين ودول اتعملوا على احدث صاحية واتكلفوا 90 مليون دولار والأسبوع اللي فاتت سافر الريس وقام بتدشين العبارتين مع العاهل السعودي طبعا تحيه واجبه مننا للمملكة على الهدية القيمة دى ومقبولة وعقبال المعتقلين.

إسرائيل عملت تصرف غريب من وجهة نظر الناس المحترمة لكن مش غريب أبدا على الصهاينة عملت أيه بقى عملت مزاد وباعت الهدايا اللي كانت بتيجى للحكومات الإسرائيلية من شخصيات عربيه وبعض الهدايا شالت أسامي الناس اللي أهدوها طبعا عشان ميتفضحوش وفى ناس مفضوحين أصلا فماشالوش اسأميهم .

أشهر ناشر مصري في النص قرن اللي فات في ذمة الله الحاج محمد مدبولى نسأل الله له المغفرة .

الأمن بتاعنا الهمام مازال يشارك في حصار غزه ويمنع القافلة الثالثة ويتعدى على المعارضين والصحفيين وسلملى على أحكام القضاء والحق الدستوري والنخوة العربية.

شاب كان بيحلم بالسفر قام واحد سمسار قاله هسفرك يا غالى بس تعالى نعملك شوية تحاليل وفحوصات خدوا مستشفى شهير بالدقي الولا نام وصحي لاقاهم واخدين الكليه بتاعته على طريقة فيلم الحقووووناااا للفنان نور الشريف مافيا تجارة الأعضاء شغاله زى السلاموا عليكم .

سمعنا من فترة إن شيخ مشايخ الطرق الصوفية مات الله يرحمه وسمعنا إنهم انتخبوا واحد وبعدين رجعوا في كلامهم والموضوع كبر وقضايا وتوكيلات وحملات وحاجة تكسف انا مش فاهم الناس بقت ميته على الدنيا وفرحانه بالمسميات أوى كده ليه وبعدين دول المفروض عالم بتوع آخره ودين ولا أنا غلطان ولا مش فاهم ولا أيه ؟؟ ولا هى كلها وشوش بلاستك .

رجال دين بيقولولك الحج الفاخر تجارة وليس عبادة وأنا متفق تماما بس أنا بشوف رجال دين بيحجوا فاخر برده .

الدبلوماسيين المصريون من أسوأ المخالفين لقواعد المرور فى لندن وده اكيد طبعا الناس اللى تربت على مرور القاهرة ومبدأ البوز بيز ااكيد هيبقوا مخالفين في أي مكان في العالم .

خبر خلانى افتكر أفلام زمان لما كانت جدتك تديك قرش وتقولك روح جيب حلبسه يا توفيق ورجع بيا الزمن لأيام الشلن والبريزة والريال والربع جنيا المخروم اللي كان صيحه لانى عرفت انه تم طرح 115 مليون جنيه من العملات المعدنية فئة الجنيه والنص جنيه آه الجنيه بقى عمله معدنيه بقى زى القرش بتاع ستى وستك .

عادة انا مش بحب أخوض في حوارات الحوادث والقضايا لانى بشوف انها حالات فرديه ممكن الناس تحب ترغى فيها وودور عليها لكن الأخبار بتبقى غير دقيقة والحقيقة بتبقى على غير المتداول وعشان كده مكتبتش عن مقتل البنتين بتوع الشيخ زايد .

وانهاردة بكتب عشان احط خبر واحد( الطب الشرعى يكشف عن عذرية نادين وعدم وجود اى اثار لتعاطى المخدرات )) وأقول إنا لله وإنا إليه راجعون وأتمنى أن يكون ظلم البنت والخوض في عرضها وشرفها وعرض وشرف أهلها في ميزان حسناتها .

_________________
القلب الابيض هو الذي يحمل الخير لغيره وان اسودت الدنيا من حوله
الرجوع الى أعلى الصفحة اذهب الى الأسفل
http://vet-isma3lia.yoo7.com
 
أخبار بلدنا اليومين اللي فاتوا...بس بطريقة مختلفة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
College Of Veterinary Medicine :: «®°·.¸.•°°·.¸.•°™ General Sections ™°·.¸.•°°·.¸.•°®» :: الأخبار العالمية والمحلية-
انتقل الى: